اقپاراتتار  اعىنى

*«قازاگرو» حولدينگى ەگىن ناۋقانىن قارجىلاندىرۋعا وتىنىمدەر قابىلداي باستادى. قۇرىلىمنىڭ ءباسپاسوز قىزمەتى حابارلاعانداي, اگرووندىرىستىك كەشەن سۋبەكتىلەرىن قولداۋ ماقساتىندا حولدينگكە 60 ملرد. تەڭگە كولەمىندە بيۋدجەتتىك نەسيە بەرىلدى. * ەلىمىزدە كاسىپكەرلەردى قولدايتىن جاڭا باعدارلاما ىسكە قوسىلدى. «بايتەرەك» حولدينگى وكىلدەرىنىڭ سوزىنە قاراعاندا, وعان ءوز ونىمدەرىن ەكسپورتتاعان, ءوسىم قارقىنى مەن تۇراقتى قارجى كورسەتكىشتەرىنە يە ورتا بيزنەستەگى وتاندىق كاسىپورىندار قاتىسا الادى. * رەسپۋبليكامىزدا تىركەلگەن زاڭدى تۇلعالاردىڭ قاتارى ءوسىپ كەلەدى. ۇلتتىق ەكونوميكا مينيسترلىگىنىڭ ءباسپاسوز قىزمەتى ءمالىم ەتكەندەي, قازىرگى تاڭدا اتالعان ساناتتاعى ازاماتتار سانى 353 833 بىرلىكتى قۇراعان. بۇل – وتكەن جىلعى سايكەس كەزەڭمەن سالىستىرعاندا 4,4 پايىزعا ارتىق. * استانادا «قامقورلىق» اكتسياسى اياسىندا بالالارعا الەۋمەتتىك كومەك كورسەتىلدى. ناقتىلاي ايتقاندا, ەلوردالىق 7 مەكتەپتەن كەلگەن 50 وقۋشىعا قالالىق ءبىلىم باسقارماسى مەن «KZ» قوعامدىق قورى قىستىق كيىمدەر سىيلادى. ايتا كەتەيىك, 2014 جىلى بۇل اكتسيا شەڭبەرىندە قالا بويىنشا 23 ملن. تەڭگەدەن ارتىق قارجى جينالعان. *الماتى وبلىسىندا زاماناۋي جىلىجاي اشىلدى. ايماق باسشىسى اماندىق باتالوۆ بۇل جوبانىڭ «بيزنەستىڭ جول كارتاسى-2020» جانە «اگرو­­­بيزنەس-2020» مب اياسىندا ىسكە اسىرىلعانىن مالىمدەدى. قاراساي اۋدانىنداعى «مادمار» شارۋا قوجالىعىنا تيەسىلى كە­شەن­­نىڭ اۋماعى 6 گەكتاردى قۇ­­راي­دى. مۇندا 2 مىڭ تونناعا دەيىن كوكونىس وسىرۋگە مۇمكىندىك بار. * وڭتۇستىك قازاقستان مەم­لەكەتتىك ۋنيۆەرسيتەتى ءۇيد مب بويىنشا ماماندار دايىندايدى. اتالمىش وقۋ ورنىنىڭ پرورەكتورى دارحان سابىرحانوۆتىڭ ايتۋىنشا, ازىرگە قۇرىلىس يندۋسترياسى, تاماق جانە حيميا ونەركاسىپتەرى مەن مۇناي-حيميا سالاسىنا قاجەتتى مامانداردىڭ سۇرانىسىن قاناعاتتاندىرۋ كوزدەلىپ وتىر. بۇل باعىتتا ۇكىمەت تاراپىنان قارجى جەتكىلىكتى دەڭگەيدە قارالعان. * قىزىلوردالىقتار «ال­تىن اسىق» باعدارلاماسىن ءتيىمدى پايدالانىپ كەلەدى. وبلىس اكىمدىگىنىڭ ءباسپاسوز قىزمەتى اتاپ كورسەتكەندەي, وتكەن جىلى وڭىردەگى 12 شارۋاشىلىق «اگرارلىق نەسيە كورپوراتسياسى» اق-تىڭ وبلىستىق فيليالى ارقىلى 131,0 ملن. تەڭگەگە 5 627, ال 5 ۇجىم ءوز قارجىسى ەسەبىنەن 96,2 ملن. تەڭگەگە 4 470 باس قوي ساتىپ العان. * اقمولا وبلىسىندا ەكسپو-2017 نىساندارى­نا قا­جەتتى قۇرىلىس ماتەريالدا­رى شى­عارىلا باستادى. وبلىس اكىمدىگى ءباسپاسوز قىزمەتىنىڭ دەرەگىنشە, شورتاندى اۋدا­نىنداعى Turan industry جشس تابيعي تاستاردان (تراۆەرتين, ءمارمار, گرانيت) قاپتاۋىش تاقتالار ءوندىرىپ وتىر. سونداي-اق, جاڭا تەحنولوگيالارمەن جابدىقتالعان كاسىپورىن جىلىنا 50 مىڭ توننا وزگە دە ونىمدەر شىعارۋدى جولعا قويعان. * قوستانايلىق ارداگەرلەرگە 150 مىڭ تەڭگەدەن بەرىلەدى. وبلىس اكىمدىگىنىڭ ءباسپاسوز قىزمەتى ۇلى وتان سوعىسىنىڭ 70 جىلدىعىنا ارنالعان شارالاردى وتكىزۋگە رەسپۋبليكالىق بيۋدجەتتەن 326,1 ملن. تەڭگە بولىنگەنىن جەتكىزدى. قازىرگى تاڭدا وڭىردە سوعىس ارداگەرلەرى مەن مۇگەدەكتەرىنىڭ سانى – 366. *پاۆلودار وبلىسىنىڭ قىزىلجار اۋىلىنداعى قۇس فابريكاسى العاشقى ونىمدەرىن نارىققا شىعاردى. اۋىلدىق وكرۋگتىڭ اكىمى ەرجان تۇسىپبەكوۆ «بيزنەستىڭ جول كارتاسى-2020» جانە «اگروبيزنەس-2020» باعدار­لامالارى اياسىندا ىسكە قوسىلعان كاسىپورىن 1 500 تونناداي قۇس ەتىن جەرگىلىكتى نارىققا جونەلتكەنىن جەتكىزدى. بولاشاقتا اتالمىش فابريكا ءوڭىردىڭ قۇس ەتىنە دەگەن سۇرانىسىنىڭ 70 پايىزىن وتەۋدى جوسپارلاپ وتىرعان كورىنەدى. حابارلار ۇكىمەت, وبلىستىق اكىمدىكتەر سايتتارى مەن «قازاقپارات» دەرەكتەرى بويىنشا دايىندالدى.